ايه حوار حلايب وشلاتين؟

وأنا صغير، كان عندي هواية غريبه نوعاً ما وهي إني دايمًا أتابع شريط توقعات درجات الحرارة اللي بيظهر على التلفزيون، واللي كان بيستعرض أحوال الطقس في مختلف مناطق مصر. وسط كل الأسماء اللي كانت بتعدّي، كان في منطقتين دايمًا بيلفتوا انتباهي وبيثيروا فضولي جدًا. وإحنا أطفال، كنا دايمًا فاكرين إن نهاية خريطة مصر بتقف عند أسوان والنوبة، لكن الحقيقة إن في أماكن أبعد، وأغنى، وأعمق في هويتنا مما كنا نتصور. فيه منطقتين تحديدًا، أجيال كاملة معرفتش عنهم كتير، وما وصلهمش عنهم حكايات كفاية… رغم إن عايش فيها ناس زينا وكمان فيها مناظر خلابة وغير مكتشفه لكتير من الناس

هل كنت تعرف إن المنطقتين دول هما: حلايب وشلاتين
طب يا ترى ايه هو حوار حلايب وشلاتين؟

جغرافيا وهوية منسية

.منطقة حلايب وشلاتين هي منطقة بتقع على الطرف الأفريقي للبحر الأحمر، مساحتها حوالي 20,580 كم²، وتضم ثلاث بلدات رئيسية هي حلايب، أبو رماد، وشلاتين. المنطقة تتبع مصر سياسيًا وإداريًا

وكلمة شلاتين في اللغة يعني مجموعة ابار ولوقت قريب هي كانت محطة مهمه جدا للقبائل والابل للسقية وكمان كانت بوابة للعبور للصحراء الشرقية، اما كلمة حلايب فاسمها جي من شجرة الاوليب واللي كانت معروفه بكثرتها هناك،وبردو كانت كانت جزء مهم من مسار رحلات الحجاج زمان. ولأهمية المنطقة دي كانت دايما عليها نزاعات سياسة بين مصر والسودان

.وعشان نعرف اكتر حكاية المنطقة دي هنروح في رحلة هنرجع بيها ورا شويه في الزمن هنربط بيها الأحداث كلها ونعرف ايه سبب النزاعات دي

الخلفية التاريخية

كان ياما كان في عصر محمد علي، كانت نفوذه ممتده لبلاد كتير نظراً لأن محمد علي كان من اقوى حكام مصر وهو مؤسس مصر الحديثة، كانت السودان وقتها واحدة من ضمن الدول التي تقع تحت التاج المصري والدول كانت عبارة عن (مصر، السودان، الحجاز، نجد، الشام (سوريا، لبنان، فلسطين)، الأناضول، جزيرة كريت.)
لكن بعد معاهدة لندن سنة ١٨٤٠ وإللي اجبر محمد علي فيها على الانسحاب من كل الدول دي، باستثناء السودان فبقى حكم محمد علي عبارة عن مصر والسودان فقط وبيتم توارث الحكم مع اسرته.
طيب هل الحكاية خلصت على كدا؟ الاجابة انه لا والاستعمار البريطاني كان له رأي تاني……

بعد الاحتلال البريطاني على مصر سنة ١٨٨٢،وقعت مصر اتفاقية حكم مشترك مع بريطانيا على السودان واتسمت باتفاقية ١٨٩٩ واترفعت اعلام بريطانيا ومصر على الأراضي السودانية، لكن في الحقيقة ده كان مجرد إجراءات صورية لأن على ارض الواقع بريطانيا كانت مسيطره على زمام الامور لوحدها.

كانت الحدود المصرية السودانية مستقرة، ومعتمدة على اتفاقية 1899 الموقعة بين مصر وبريطانيا، لانهم كانوا أصحاب الحكم الثنائى على السودان. والاتفاقية دي كانت فيها حلايب وشلاتين من ضمن الحدود المصرية، وفضلت الأمور ماشيه بشكل عادي لحد سنة ١٩٥٨……

لما السودان قررت انها تضيف حلايب وشلاتين ضمن الدوائر الانتخابية بتاعتها، هنا اعترضت مصر على الفعل ده وحاولت انها تحل الازمة بشكل ودي عشان تحافظ على العلاقات مع السودان، لكن السودان قررت هتدافع عن حقها وهتصعد الامور لمجلس الأمن لكن الأمور بعدها هديت بين البلدين ومتمش النظر في القضية تاني لحد سنة ١٩٩٢
طيب ايه إللي خلى القضية ترجع تاني ع الساحة من جديد؟ ان السودان سنة ٩٢ وقعت مع شركات كندية عشان تنقب عن البترول، وده زود من اهمية المنطقة لأنها هتعود بمكاسب اقتصادية مهمة

وفضل في توتر في العلاقات بين مصر و السودان لحد ما وصلت لذروتها لما حصل محاولة لاغتيال الرئيس محمد حسني مبارك في اديس ابابا عاصمة اثيوبيا، ومصر وجهت الاتهامات وقتها للسودان بالفعل ده
و رداً على المحاولة دي قررت مصر انها هتسيطر على اراضي حلايب وشلاتين بالقوة ومن وقتها حلايب وشلاتين تابعين لمصر.
طيب احنا اتكلمنا على الناحية التاريخية للاحداث هناك. طب بنسبه للحياة هناك عامله إزاي؟ ومين الناس اللي عايشه هناك بظبط ؟

منطقة حلايب وشلاتين فيها اهم محمية طبيعيه في مصر وهي محمية جبل علبة إللي بتقع جنوب شرق مصر في البحر الاحمر وإللي تم إعلانها كمحمية طبيعيه سنة ١٩٨٦ لأنها بتحتوي على كتير من الموارد الطبيعية والبشرية والثقافية.
وكمان حواليها البحر الأحمر بثرواته البحرية الكبيرة من شعب مرجانية وكائنات بحرية نادرة، كمان في كتير من جزر البحر الأحمر في نطاق حدود المحمية، وإللي فيها السلاحف البحرية وأنواع كتيره من الطيور النادرة المقيمة والمهاجرة، وأنواع من أشجار المانجروف إللي اهميته البيئية والاقتصادية كبيرة جدا.

التراث البيئي ومجتمع محلي غني بالثقافات

في قبائل مختلفه عايشين هناك واهم القبائل دي هي قبائل العبابدة والبشاريه والرشايدة.
البشارية هم من السكان المستقرين لغويًا شبه بدو، وبيتكلموا لغة غير مكتوبة، “البجة”.البشارية عايشين في الأجزاء الجنوبية من محمية جبل علبة.
العبابدة قبيلة أصلية في جنوب الصحراء الشرقية، و في الغالب عايشين في الأجزاء الشمالية من المحمية.
الرشايدة قبيلة غير أصلية جايه من السهل الساحلي، في الأصل، من المملكة العربية السعودية. تم ترحال القبيلة في عام 1846 واستقرت على طول ساحل البحر الأحمر من السودان جنوباً إلى إريتريا.

من اهم القرى والمدن هناك هما ابرق،الجاهليه،ابو سفعه،قمبيت وابو حديد ومدن تانيه كتير.
الأنشطة الاجتماعية والاقتصادية الرئيسية للقبائل المحلية هي رعي الماشية، وإنتاج الفحم، وفي شوية تجارة محدودة في المنتجات الطبيعية الأخرى، زي العسل والنباتات الطبية اللي تُباع كعلاجات.
لكن في اخر كام سنة بدأت المجتمعات الساحلية تمارس الصيد من قبل رجال القبائل المحليين والمصريين إللي عايشين في المنطقة.
في النهاية، مصر متنوعة بمناطقها إللي فيها حاجات كتيره جميله من اول الموارد الطبيعية لحد الثقافات والبشر إللي عايشين فيها وللاسف مهدور حقها في الكلام عنها.
والاكيد أن حلايب وشلاتين من ضمن المناطق دي.